Já það er orðið langt síðan síðast, verð trúlega að fara að fá mér nýjan ritara þessi sem ég hef er ekki alveg að standa sig.  Annars er allt gott að frétta af mér ég dafna eins og blóm í eggi.  Við mamma höfum verið meira og minna tvær frá áramótum en stóri bróðir minn hann Baldur er komin á sjó og ég sakna hans voðalega mikið.  Á föstudaginn kemur pabbi heim frá Hólum og verður þá alveg heima hjá okkur mömmu en hann ætlar að vera í fjarnámi restina af skólaárinu.

Ég er orðin rosalega dugleg að lesa og les fyrir mömmu á hverjum degi, segist vera að æfa mig fyrir skólann.  nú er að koma mynd á skólann minn en ég fylgist spennt með hvernig þeim gengur að byggja hann.

Í sumar þá ætlum ég, mamma og pabbi að vera á Núpi í Dýrafirði allt sumarið og ég bíð spennt eftir því, finnst tíminn allt of lengi að líða þangað til ég hætti á leikskólanum. Við ætlum að taka smá forskot á sæluna og vera á Núpi yfir páskana og Harpa, Guðrún og Soffía frænkur mínar verða þar líka með sínar fjölskyldur þannig að það stefnir í mikið gaman mikið fjör

Um síðustu helgi þá gistu þeir frændur mínir í Löngumýrinni hjá okkur á föstudaginn og ég fékk svo að fara með þeim á laugardaginn og vera hjá þeim fram á sunnudag ekkert smá gaman hjá okkur Kormáki, enda erum við bestu vinir.

bæjó þangað til næst

Helga Guðrún

Gleðilegt nýtt ár:)

Þá er byrjað árið sem ég verð 6 ára á og það byrjar heldur betur með breytingum, Baldur stóri bróðir minn er farinn á sjó sem messagutti þannig að þegar pabbi fer í skólann í næstu viku þá verðum við mamma bara tvær í kotinu.

Um jólin var Nína heima hjá okkur og líka Siggi frændi þannig að það var fjör í kotinu, síðan fórum við til Reykjavíkur á annan í jólum en þann 27 des. var litli frændi minn skírður og fékk hann nafnið Arnviður. Síðan hittum við föðurfjölskylduna hans pabba á einu bretti þann 30 des. áramótunum eyddum við svo með systkinum pabba og fórum síðan í heimsókn til Soffíu frænku og Grétars og vorum þar fram á nótt:)

Við komum svo við í bústaðnum hjá Ingu og Binna á leið okkar heim þann 2 jan og vorum eina nótt.  Það var glöð lítil stúlka sem kom heim til sín þann 3. jan eftir viku fjarveru:)

Svo í morgun var vaknað með erfiðismunum til að fara á leikskólann:)

Mamma var loksins að koma inn myndum frá afmælinu mínu og fram að áramótum eða svo gott sem hún á eftir að skella inn áramótamyndum.

kveðja

Helga Guðrún

Loksins orðin 5 ára, já ég varð 5 ára fyrir 2 dögum síðan þá var ég í pössun hjá ömmu og hún var búin að baka handa mér köku þegar ég kom heim af leikskólanum og systkini mín og langamma komu í kaffi það var æðislegt. Og svo er nú það besta af öllu að ég fékk litla frænku í afmælisgjöf en Einara frænka mín átti þann 5 nóvember og þetta er 3ja langalangömmubarnið sem er fætt þennan dag sem var afmælisdagur langalangömmu minnar og það finnst öllum alveg frábært:):):)

Annars er það besta að þegar pabbi hringdi í mig á afmælisdaginn þá sagði ég strax við hann "pabbi þegar þú kemur heim á morgun viltu þá taka hjálpardekkin af hjólinu mínu" pabba fannst þetta nú skrítin bón þar sem hjólið er löngu komið í geymslu og sagðist gera það næsta sumar. "já en pabbi þú ætlaðir að gera það þegar ég yrði orðin 5 ára og núna er ég orðin 5:):):)" svo er sagt að fílar gleymi engu:):)

Mamma var semsagt ekki heima frá mánudegi -  fimmtudags hún gerði hvorki meira né minna en að skella sér til Hafnar í Hornafirði með vinnunni:):)

En nú eru allir komnir heim:):)

kveðja

Helga Guðrún

Nú er ég kát pabbi komin heim og verður alveg fram á mánudag í þetta skiptið. Ég kom mömmu heldur betur í vandræði á leikskólanum í morgun en þegar við komum inn á tilkynnti ég vini mínum sem labbaði inn um leið að "pabbi hefði gist heima í nótt en hann væri sko fluttur" mömmu fannst þetta bara fyndið en hin mamman varð hálfskrítin á svipin:):):) Svo mamma leiðrétti þennan miskilning að þau pabbi væru ekki skilin heldur væri pabbi í skóla á Hólum og því bara heima um helgar:):):) og þá hló hin mamman mikið og sagði að það væri nú eins gott að fólk vissi það, það væri auðvelt að misskilja svona yfirlýsingar.

Á morgun ætlum við að fara í sveitina til afa og ömmu það verður sko fjör enda held ég að það verði bara allir þar þannig að þetta verður gaman, gaman.

Ég er alltaf á sundæfingum en hef nú verið frekar treg að kafa mikið hingað til reyni að koma mér hjá því eins og ég mögulega get en hún Dilla er nú ekkert alveg á því að láta mig komast upp með það:)

Hæ hæ af mér er allt gott að frétta við mamma erum í óða önn að flytja dótið mitt á milli herbergja og ég er ekki neitt smá dugleg að leika mér í nýja herberginu mínu enda miklu meira pláss í því:) Um helgina ætlum við mamma að heimsækja pabba á Hóla og fara með honum á Laufskálarétt að sjá alla hestana sem mér skilst að séu mjög margir.

Um síðustu helgi fór pabbi vestur á Núp en við mamma fórum í sveitina til afa og ömmu að hjálpa til við að smala og fara yfir hvort allar kindurnar hans afa hafi skilað sér það vantar nú eitthvað aðeins ennþá en ekki margar. Kormákur vinur minn var líka í sveitinni þannig að þetta var stanslaust fjör.

Áður en við fórum í sveitina þá fékk ég að gista hjá Nínu systur sem mér fannst ekki vera neitt smá stopp, það er hætt við að ég eigi eftir að sakna hennar þegar hún fer burtu í háskóla, mamma reiknar með að ég verði fljót að læra á tölvu til að geta verið í samandi við hana:):)

Ég er enn jafn dugleg á sundnámskeiðinu og það er alltaf jafngaman ég er sko með það á hreinu hversu margir tímar eru búnir ofan í lauginni án þess að það hafi eitthvað verið rætt t.d tilkynnti ég á þriðjudaginn að nú væri 6 tíminn sem væri farið ofaní laugina:) Rétt var það hjá mér og mömmu finnst ég vera rosalega klár.

Nú er margt búið að gerast siðan síðast, pabbi farin í skóla á Hólum og þar sem ég veit hvað það er leiðinlegt að sofa ein í herbergi þá var ég fljót að flytja inn til mömmu bara svo henni leiðist ekki:):)

Nína er líka flutt að heiman og mér fannst það nú frekar leiðinlegur dagur þegar pabbi fór og Nína líka sama daginn en hún er búin að lofa mér því að ég megi koma og gista hjá henni þegar hún verður búin að koma sér fyrir.

Ég er á leiðinni vestur í Dýrafjörð með pabba og mömmu um helgina það verður ekki neitt smá gaman að koma þangað aftur og nú hitti ég Jafet og Nínu Rún en þau voru ekki heima þegar við vorum þar í sumar.

Mamma var að skella inn nýjum myndum úr restinni af fríinu okkar í sumar, siglingunni um Breiðafjörðinn og úr Hópinu.

Það er nú ekki af mér skafið að ég sé dama með skoðanir:)  Nú uppá síðkastið hefur mér verið mjög hugleikið þetta óréttlæti að ég skuli "hafa komið síðust" úr maganum á mömmu og ég þreytist ekkert á því að eiga þessar umræður við hana að ég hafi ekki ætlað að verða síðust og hvort það sé ekki eitt barn enn þarna inni, en mamma er nú alveg á því að 3 séu nóg og ég ein og sér sé nú á við  þannig að það sé borin von.  En ég gefst ekki upp og hef meira að segja gengið svo langt að ganga á milli manna og segja að mamma mín sé sko með eitt barn enn í maganum.

Nú er gamla komin í átak í þeirri von að svona þegar vetur nálgist þá fari það ekkert á milli mála að hún sé EKKI ólétt þar sem ég er svona líka dugleg í söguburðinum:)

Annars styttist í að hann pabbi minn fari að fara burtu í skólann svona reglulega og mamma hefur verið að undirbúa mig með það að hann verði nú ekki alltaf heima þegar fari að hausta og þá sagði ég "mamma ég elska pabba þegar hann fer" og auðvitað átti ég við að ég mun sakna hans:):) 

Þá er sumarfríið búið og ég byrjuð aftur á leikskólanum. Í fríinu þá fór ég vestur í Dýrafjörð nánar tiltekið á Núp með pabba og mömmu en pabbi var að elda þar í nokkra daga á hótelinu hjá Sigga frænda og ég skal sko segja ykkur það að þetta sveitalíf er svo sannarlega eitthvað sem ég mér líkar við en þarna vorum við í 12 daga og ég vaknaði á morgnanna fór út að leika og kom inn þegar ég var svöng eða þannig var það svona oftast við skruppum líka til Þingeyrar, í Hjarðardalinn, yfir á Ingjaldsand og á Ísafjörð en það voru nú yfirleitt ekki löng stopp.

Á Núpi fundum við mamma þessa líka fínu strönd og skelltum okkur þangað í sól og blíðu en það var sól og blíða svona oftast:) þegar við fórum frá Núpi þá stoppuðum við hjá Hörpu frænku og skelltum okkur með þeim í siglingu um Breiðarfjörð í geggjuðu veðri fjörðurinn var svo sléttur að eyjarnar spegluðust í honum þar fórum við og skoðuðum hvar þau ætla að byggja sér bústað og á meðan ég, Lydía, mamma og Harpa sóluðum okkur og týndum kuðunga í eyjunni fór karlpeningurinn og veiddi lunda og skarf.

Þegar heim var komið eftir 2ja vikna fjarveru var aðeins stoppað eina nótt en síðan fórum við í bústaðinn okkar við Vesturhóp og vorum þar í 4 daga yfir versló og ég fékk veiðistöng og veiddi 2 fiska á hana í fyrstu ferðinni:):) nokkuð glúrinn veiðimaður skal ég segja ykkur.

Mamma er búin að setja inn nokkrar myndir frá sumrinu en það eiga eftir að koma fleiri það gerist vonandi í kvöld eða á morgun:)

jæja þá er maður komin í sumarfrí frá leikskólanum, pabbi og mamma byrja reyndar ekki í sínu sumarfríi fyrr en í næstu viku en þá daga sem pabbi er ekki í fríi núna þá erum við systur bara að dúlla okkur saman svo fæ ég kannski eitthvað að heimsækja hann Kormák:)  Annars erum við Kormákur heldur hættuleg tvö saman að minnsta kosti fyrir garða í nágrenni við okkur en sælla minninga þá fórum við í garðinn hjá ömmu Sísí í útskriftinni hennar Önnu og slitum upp blómin hjá nágrannanum ásamt rabbabara og gróðursettum aftur í beðið sem hann var að útbúa.  Nú á mánudagskvöldið fórum við mamma í heimsókn í Löngumýrina og við Kormákur fórum sæl og ánægð út að leika það endaði með því að við vorum búin að slíta upp megnið af njólanum í nágrenninu og dreifa yfir steinabeð nágrannans við litla ánægju mæðranna.  Aldrei má maður ekki neitt

Fórum á ættarmót um helgina það var svaka fjör og mikið gaman fékk að vera að mestu leiti frjáls úti að leika mér með Lydíu frænku alla helgina ekkert smá fjör það.

Svo í næstu viku þá förum við ég, mamma og pabbi vestur í Dýrafjörð og verðum á Hótel Núpi hjá Sigga frænda í tvær vikur eða svo en pabbi ætlar að elda fyrir hann á hótelinu í 10 daga. 

Fer að ýta á liðið að skella inn ættarmótsmyndum og myndum frá því sem af er sumri annars eru þau ekki nógu dugleg að muna eftir að taka myndavélina með sér svona í daglegu útstáelsi sem á það til að enda í sundlaugargarðinum eða á einhverjum leikvelli.

kveðja

Helga Guðrún 

Hæ hæ

Það er ýmislegt búið að gerast síðan síðast en mamma er nú útskrifuð sem BSc í líftækni en hún ætlar að halda áfram og taka master og byrjar hún á því í haust.

Pabbi er búin að fá inni í skólanum á Hólum og byrjar hann þar í september það verður frekar skrítið að hafa hann ekki heima nema um helgar en það hlýtur að venjast.

Nú styttist í það að við förum á ættarmót það held ég að verði svaka fjör get ekki beðið eftir að hitta Einar Berg vin minn og frænda ásamt því að hitta Lydíu aftur en við brölluðum ýmislegt þegar hún var hér hjá mér fyrir 2 vikum.

Síðan um síðustu helgi þá fékk ég að fara með Birnu, Rögga og strákunum í Hrísey það var svaka fjör og  mikið gaman.

Nú er vika eftir þangað til ég fer í sumarfrí á leikskólanum og síðan viku seinna byrja pabbi og mamma í sínu sumarfríi það verður gaman þegar að því kemur en þá förum við vestur í Dýrafjörð og verðum þar hjá Sigga frænda í tíu daga eða svo ætlum líka að koma við hjá Hörpu frænku á leiðinni vestur amk eina nótt.

kv

Helga Guðrún 

Mamma er að dunda við að breyta heimasíðunni minni og haldiði ekki að hún hafi fundið þennan líka flotta bakgrunn með Dóru uppáhaldinu mínu. Á meðan hún er að breyta síðunni verðið þið að sína henni biðlund þótt eitthvað virki skrítið í nokkra daga Róm var jú ekki byggð á einum degi og það sama á við um uppsetningu á heimasíðu liti og annað

Og smá leiðrétting síðan síðast þá voru 10 dagar í veisluna hennar mömmu en ekki 110 en það er bara um næstu helgi sem hún útskrifast og þá kemur fullt af fólki en ég bíð spenntust eftir að Lydía frænka komi og gisti hjá mér.

Nú er sko gaman að lifa veðrið búið að vera þannig að ég er bara á stuttbuxum alla daga eða svona nokkurn veginn og það á sko við mig:):)

Annars fór ég með pabba og mömmu í bústaðinn um helgina og það var ekki leiðinlegt og ekki spillti fyrir að það var stelpa jafngömul mér í einum bústaðnum og við lékum okkur saman meira og minna alla helgina það var sko ekki leiðinlegt.  Við mamma fundum eitt hrossagaukshreiður rétt hjá bústaðnum okkar og svo sáum við þröst sem var alltaf að tína orma en fundum ekki hreiðrið hans þrátt fyrir að hafa leitað að því.  Ég var búin að vona að hann Einar Berg vinur minn yrði í bústaðnum hjá Guðbjörtu frænku en þar var enginn en ég hitti hann vonandi á ættarmótinu í sumar.

Mamma ætlar að skella hér inn myndum út hópinu við tækifæri ég átti nátturulega alveg einstakt gullkorn í bústaðnum en þannig var að við vorum út á bátnum og bæði pabbi og mamma voru búin að verða vör en það var minna eftir af pabba ormi. Svo verða þau aftur vör og fara að draga inn þá segi ég "pabbi við erum saman í liði" nema hvað að mamma fær fisk en ekki pabbi og þá var ég fljót að skipta um skoðun og sagði "mamma erum við ekki saman í liði?" þetta fannst gamla settinu ekki leiðinlegt.

Nú styttist í að mamma útskrifist en það er eftir 110 daga og þá fæ ég loksins afmælisveisluna sem mér fannst að hefði átt að vera fyrir löngu. 

Ég veit hreinlega ekki hvernig ég á að vera þessa dagana MAMMA er bara alltaf heima aldrei friður fyrir henni, annars er ég mjög ánægð með það en finnst það samt hálfundarlegt að allt í einu er hún bara hætt að vera í skólanum alla daga.

Um leið og mamma var búin í seinna prófinu sínu þá fórum við tvær með ömmu í sveitina og vorum þar yfir hvítasunnuhelgina. Þetta var bara æðislegt þegar við komum í sveitina kom afi á móti okkur og sagði að það væru að fæðast lömb svo við mamma flýttum okkur út í fjárhús og viti menn fullt af lömbum á leiðinni.

Mér fannst þetta nú dálítið merkilegt það kemur "blaðra"(belgurinn) og síðan kemur bara lamb enda var ég fljót að læra að maður fer og athugar hvort það séu blöðrur á rassinum á kindunum. Ég eignaðist líka góða vinkonu í fjárhúsnunum hjá afa hana Gefnjunni svo skírði ég einn hrútinn hann heitir Breki og afi ætlar að láta hann heita það ef hann verður látinn lifa í haust.

Annars er hjólið mitt komið úr geymslu og ég fæ alltaf að hjóla á leikskólann þó það sé ekki langt og ef veðrið er gott þá förum við mamma löngu leiðina heim þ.e hún labbar og ég hjóla, held nú samt að hún sé að vonast til að fá hjól eða pening uppí hjól í afmælisgjöf svo við getum þá kannski bara farið að hjóla saman.

En þótt ég hafi verið í sveitinni í 3 daga um helgina þá var ég nú aldeilis ekki búin að fá nóg af sveit því leikskólinn fór í sveitaferð á þriðjudaginn og mamma kom og við urðum eftir en vinkona hennar á heima á Stóra Dunhaga og ég fékk síðan að fara í fjós þar áður en við fórum heim.